A Asociación de Amigos de Otero Pedrayo convoca a cuarta edición do seu premio de oratoria en formato pódcast, dirixido ao alumnado galego de entre 15 e 18 anos. O certame anima a mocidade a reflexionar en galego sobre temas vencellados ao pensamento do autor e a exercitar a expresión oral.

Este galardón, que conta coa colaboración da Secretaría Xeral de Lingua e da cooperativa agraria Coren, busca fomentar o coñecemento da figura do escritor e político galeguista entre os máis novos, así como alimentar o cultivo da oratoria, faceta na que o patriarca das Letras Galegas era todo un mestre.